07 December 2007

အောင်ဆန်း စိတ်ဓာတ် (Aung San Spirit)


( စတုတ္ထအကြိမ်၊ ၁၉၆၉၊ သြဂုတ်လထုတ်၊ အောင်သန်း(ဗိုလ်ချုပ်အောင်ဆန်း၏ အစ်ကိုအရင်း) ရေးသော “အောင်သန်း၏ အောင်ဆန်း” စာအုပ်မှ ကောက်နုတ်ဖော်ပြလိုက်ပါသည်။ စာမျက်နှာ ၅၃-၅၇ -သတ်ပုံမူရင်းအတိုင်း)


သခင်အောင်ဆန်းသည် မိခင်ကို အလွန်ချစ်ပါသည်။ ကျွန်တော်တို့အစ်ကိုတွေ ချစ်သည်ထက် ပို၍ ချစ်ပါသည်။ မိခင်ကလည်း အခြားသားများအပေါ်ထက် အငယ်ဆုံးသားကလေးအပေါ်တွင် သံယောဇဉ်ပိုပါသည်။ သို့ပါလျက် သခင်အောင်ဆန်းသည် မိခင်အပေါ် စိမ်းကားသလို ဖြစ်နေသည်မှာ အခြားကြောင့်မဟုတ်၊ တိုင်းပြည်အတွက် အသက်နှင့် ခန္ဓာကိုယ်ကို လှူထားသောကြောင့်ဖြစ်သည် ဟု ယူဆရန်ရှိသည်မှအပ အခြားအကြောင်းများ မရှိနိုင်ပါ။ သခင်အောင်ဆန်းအဖို့ စားလည်း နိုင်ငံရေး၊ အိပ်လည်း နိုင်ငံရေး ဖြစ်နေပါသည်။ နိုင်ငံရေးသာလျှင် အမိ... နိုင်ငံရေးသာလျှင်အဖ...နိုင်ငံရေးသာလျှင် ဆွေမျိုးသားချင်း ဖြစ်နေပါသည်။

ထို့ကြောင့်ပင် စာရေးဆရာ ဒဂုန်တာရာက ၁၉၄၆ ခုနှစ်တွင် ထုတ်ဝေသော “တာရာမဂ္ဂဇင်း”၌ “အောင်ဆန်း-သို့မဟုတ်-အရိုင်း” ဟူသော ခေါင်းစဉ်ဖြင့် အောက်ပါအတိုင်း ရေးသားခဲ့ပါသည်။
“သူ့တွင် နိုင်ငံရေး ၀ိဥာဉ်ကား ပြင်းထန်လှ၏။ နိုင်ငံရေး တခုတည်းသာလုပ်သော လူတဦးဖြစ်၏။ သူသည်...ရိုင်း၏၊ ကြမ်း၏၊ ကြောင်၏၊ ကိစ္စမရှိ၊ သူသည် ဧည့်ခန်းဆောင်မှ ဂုဏ်သရေရှိ လူကြီးလူကောင်းမဟုတ်၊ “တခုတည်းသော ယုံကြည်ချက်နှင့် တခုတည်းကိုသာလုပ်သော နိုင်ငံရေး သတ္တ၀ါဖြစ်၏” ထို့ကြောင့် ကိစ္စမရှိ။”

သခင်အောင်ဆန်း၏ ရိုင်းပုံ၊ ကြမ်းပုံ တို့ကို သခင်တင်မောင်(ကျုံမငေး)ကလည်း ၄-၁-၆၃ နေ့ထုတ် ကြေးမုံသတင်းစာတွင် အောက်ပါအတိုင်း ရေးခဲ့ပါသည်။
“၁၉၄၀ ခုနှစ်၊ ဇန်န၀ါရီလတွင် တို့ဗမာ အစည်းအရုံးကြီး၏ အမှုဆောင် အစည်းအဝေးကို မန္တလေးမြို့၌ ကျင်းပလေသည်။ အမှုဆောင်အားလုံး မန္တလေးရုံးတော်ကြီးရှိ ဦးဘဦးတိုက်ကြီးတွင် တည်းခိုကြသည်။ အစည်းအဝေးကိုလည်း ထိုတိုက်မှာပင် ကျင်းပလေသည်။
အမှုဆောင် အစည်းအဝေး ကျင်းပနေဆဲမှာပင် ဗြိတိသျှလေဘာပါတီ ခေါင်းဆောင်တဦးဖြစ်သူ ဆာစတက်ဖို့ကရစ်ပ်သည် ဗမာပြည်၏ အခြေအနေကို လေ့လာရန် ရောက်ရှိလာလေသည်။ ဗမာပြည်မလာမီကလေးကပင် ၄င်းအား လေဘာပါတီမှ ထုတ်ပယ်ခံထားရလေသည်။ အကြောင်းမှာ စစ်အတွင်းတွင် ဖက်ဆစ်ဆန့်ကျင်ရေးတပ်ပေါင်းစုတခု ဖွဲ့သင့်သည်ဟု ပါတီတွင် အကြံပေးမိသည့်အတွက် ဖြစ်လေသည်။

ဗမာပြည်တွင် ဦးတင်ထွဋ်အိမ်၌ ခေတ္တတည်းခိုပြီး တို့ဗမာအစည်းအရုံး ခေါင်းဆောင်များနှင့် တွေ့ဆုံဆွေးနွေးလိုသည့်အတွက် မန္တလးသို့ လိုက်ပါလာခဲ့လေသည်။ ဆာစတက်ဖို့ကရစ်ပ်အား သခင်ကျော်စိန်(ယခု ပြည်သူ့စာပေတိုက်)က မန္တလေးသို့ လိုက်ပို့ရလေသည်။ မန္တလေးတွင် ထိုလေဘာပါတီ ခေါင်းဆောင်ကြီးနှင့် တို့ဗမာအစည်းအရုံးအမှုဆောင်များ ဆွေးနွေးကြပုံမှာ ကျွန်တော့် တသက်တာတွင် မမေ့နိုင်အောင် ရှိတော့သည်။
“ဆွေးနွေးပွဲကို သခင်အောင်ဆန်း၊ သခင်သန်းထွန်း၊ သခင်စိုး၊ သခင်လေးမောင်တို့အား ဦးဆောင်ဆွေးနွေးရန် သတ်မှတ်ထားကြပါသည်။ သခင်မြမှာ မန္တလေးတွင် ကြာရှည်မနေနိုင်ဘဲ အစည်းအရုံးတာဝန်များနှင့်ပင် ရန်ကုန်သို့ပြန်သွားရလေသည်။ ဆွေးနွေးပွဲတွင် ကရစ်ပ်၏ လက်ျာဘက်က သခင်ကျော်စိန်၊ သခင်လေးမောင်၊ သခင်လှဘော်၊ သခင်ထိပ်တင်ကိုယ်တော်ကြီးတို့က ထိုင်နေကြ၏။ လက်ဝဲဘက်တွင် သခင်အောင်ဆန်း၊ သခင်သန်းထွန်း၊ သခင်စိုးနှင့် ကျွန်တော်တို့ ထိုင်နေကြသည်။

“ကရစ်ပ်က...“ဗမာပြည်ကို မလာခင်တုန်းက တို့ဗမာအစည်းအရုံးနဲ့ ခေါင်းဆောင်တွေရဲ့ အကြောင်းကို ကျွန်တော်နားလည်တာနဲ့ ဒါတွေဟာ ဗမာပြည်မြေပေါ်ရောက်လို့ တညလဲ အိပ်မိရော၊ ကျွန်တော်သိထားတာတွေဟာအားလုံး အမြီးနဲ့ ခေါင်းနဲ့ လွဲနေတာ တွေ့ရပါတယ်။” ဟုပြောယင်း ဟားတိုက် ရယ်လိုက်ပါသည်။ “ကျွန်တော် သိခဲ့တာက ခင်ဗျားတို့ အစည်းအရုံးဟာ လူရမ်းကားကလေးတွေ၊ ဆင်ခြင်တုံတရားကင်းမဲ့သူတွေ၊ သူပုန်ထဘို့ သွေးဆူနေတဲ့ သူကလေးတွေ၊ ပညာမဲ့ အလုပ်လက်မဲ့ကလေးတွေ စုပေါင်း ပါဝင်တဲ့ အစည်းအရုံးကြီးဘဲလို့ နားလည်လာခံပါတယ်။ အခုမှ ဒီလိုမဟုတ်မှန်း သိပါတော့တယ်....”။

သခင်အောင်ဆန်းက ရယ်လျက် “ဒါဟာ ဓမ္မတာပါဘဲ။ အုပ်စိုးသူဆိုတာဟာ အုပ်စိုးခံရသူများအပေါ်မှာ ဒီလိုဘဲ သဘောထားတတ်ပါတယ်။ အထူးသဖြင့် ကျွန်တော်တို့က အတိုက်အခံလုပ်နေတော့ ဒီလိုဘဲ သတင်းပေးကြမှာပါဘဲ။ တခု ကျွန်တော်ပြောချင်တာက ဗမာပြည်မှာရှိတဲ့ လူငယ်တိုင်းဟာ ဒီလိုဘဲ ပညာမဲ့ အလုပ်လက်မဲ့ လူပေ လူတေ ကလေးတွေချည်းဖြစ်နေရတယ်ဆိုရင်လဲ ဘယ်သူ့အပြစ်လဲ။ ဗြိတိသျှအုပ်စိုးခြင်းအောက်မှာ ဖြစ်ပျက်နေတဲ့ ဖြစ်ရပ်တခုအနေနဲ့ ဗြိတိသျှလူမျိုးတွေဘဲ ရှက်စရာကောင်းနေမှာပေါ့။”

ကရစ်ပ်။ ။“ကျွန်တော်တခု မေးစမ်းပါရစေ၊ စပ်စုတယ်လို့လဲ မထင်ပါနဲ့။ ရင်းရင်းနှီးနှီးသဘောထားလို့ မေးရဲတာပါ။ ခင်ဗျားတို့က အခု အင်္ဂလိပ်လက်အောက်ခံဘ၀က လွတ်အောင် ကြိုးပမ်းနေကြတယ်။ လွတ်လပ်ရေးကို ဘယ်နည်းနဲ့ရအောင် လုပ်ကြမှာလဲ”။

သခင်အောင်ဆန်း။ ။“နည်းကတော့ ကျွန်တော်တို့ တရားတယ်ထင်တဲ့နည်းနဲ့ ရအောင်လုပ်ယူရမှာဘဲ”။

ကရစ်ပ်။ ။“မစ္စတာ အောင်ဆန်းပြောတာ နားမလည်သေးပါဘူး။ ထပ်ရှင်းပြပါအုန်း”။

သခင်အောင်ဆန်း။ ။“ရှင်းပါတယ်။ တရားတယ်ထင်တဲ့နည်းဆိုတာဟာ ရရာနည်းနဲ့ လုပ်ရမယ်လို့ ဆိုတာဘဲ။ ဥပမာဗျာ ခင်ဗျားအိတ်ထဲမှာ ထည့်ထားတဲ့ ဖောင်တိန်ဟာ ကျွန်တော်ပိုင်တဲ့ ဖောင်တိန်ဆိုပါတော့။ ခင်ဗျားက ကျွန်တော့ဆီက အနိုင်ကျင့်ပြီး လုယူထားတယ်ဆိုပါတော့။ ကျွန်တော်က ခင်ဗျားကို တောင်းပန်ပြီး ပြန်ပေးပါဗျာလို့ ချော့တောင်းမယ်၊ မရရင် နောက်တနည်းနဲ့ တောင်းမယ်။ အဲဒီလို မရတဲ့ အဆုံးကျတော့ မပေးဘူးလား ပေးမလားဆိုပြီး ခြိမ်းခြောက်တောင်းမယ်။ ဒါနဲ့မရရင် ဟောဒီလို အတင်းလုယူမယ်”။

သခင်အောင်ဆန်းသည် ပြောပြောဆိုဆို ဆာစတက်ဖို့ ကရစ်ပ်၏ အိတ်ကပ်ထဲက ဖောင်တိန်ကို ဆွဲယူလိုက်ရာ ကရစ်ပ်၏ ကုတ်အင်္ကျီအိတ်ကြီး ပြဲ၍ ပါလာတော့သည်။

သခင်အောင်ဆန်းမှာ ဧည့်သည်တယောက်၏ အင်္ကျီပြဲသည်ကိုပင် အားမနာတတ်၊ အလိုက်မသိတတ်ဘဲ ဆက်၍ ပြောသေး၏ “ကဲ အဲဒီနည်းဟာ ကျွန်တော်တရားတယ်ထင်တဲ့နည်းဘဲ။ ကျွန်တော့ ဖောင်တိန်ပြန်ရတာလိုရင်းဘဲ”

ကရစ်ပ်မှာ ဘာမျှမပြောနိုင်။ အားရပါးရ ဟားတိုက်၍သာ ရယ်မောနေရရှာတော့၏။

သခင်အောင်ဆန်းက ဆက်ပြီး “ကဲ အခုလို လုပ်ယူရတော့ ကောင်းသေးရဲ့လား။ ကျွန်တော့်မှာတော့ ကျွန်တော်ဖောင်တိန် ပြန်ရပါရဲ့။ ခင်ဗျားမှာတော့ အင်္ကျီအိပ်အပြဲခံရတာသာ အဖတ်တင်တာပေါ့။ စောစောက ပြန်ပေးလိုက်ရင် အင်္ကျီလည်းမပြဲဘူး။ ကျွန်တော်လက်တောင် တော်တော်နာသွားတယ်။ ခု-ကျွန်တော်ပြောနေတာတွေဟာ အပိုပြောနေတာလဲမပါဘူး။ ချိမ်းခြောက်နေတာလဲ မဟုတ်ဖူး။ တကယ်ဖြစ်လာနိုင်တဲ့သဘောကို ပြေပြနေတာဘဲ။´

ကရစ်ပ်မှာ ဘာမှ မပြောနိုင်၊ အူတက်မတတ် ဖြစ်နေရှာသည်။ နောက်အတန်ကြာမှ “အို ချစ်စရာကောင်းတဲ့ အောင်ဆန်း ချစ်စရာကောင်းတဲ့ အောင်ဆန်း” ဟူ၍သာ ထပ်ကာထပ်ကာ ရေရွတ်၍ နေရှာပါတော့သည်။ ။


(ကဲ... အခုလည်း စစ်ကျွန်ဘ၀ကျရောက်နေတဲ့ ကျွန်တော်တို့မြန်မာပြည်သူပြည်သားတွေအနေနဲ့ မြန်မာ့လွတ်လပ်ရေး (မြန်မာ့လူ့အခွင့်အရေး)ကို ယုတ်မာဆိုးသွမ်းတဲ့ စစ်အဆိုးရဖက်ဆစ် ဆီကနေ ဘယ်လို တိုက်ယူကြရပါ့မလဲလို့... မောင်ညိုကြီး က...မေးလိုက်ပါရစေတော့.......)

04 December 2007

မစိုးရိမ်ကျောင်းတိုက် ရာပြည့်ပွဲတော်

(၄၊ ဒီဇင်ဘာ၊ ၀၀၇ - အင်္ဂါ)

(သတင်းများကို မန္တလေးမြို့ထုတ် ရတနာပုံသတင်းစာ(၂-၁၂-၀၀၇)မှလည်း ကိုးကားပါတယ်။ ဓာတ်ပုံများကတော့ ကျွန်တော့်ဘလော့ဂ်ရဲ့ မူပိုင်ဖြစ်ပါတယ်)

၃၅ လမ်းပေါ်က မြင်ကွင်း

ကျောင်းတိုက် မျက်နှာစာ တစ်ခု

မစိုးရိမ်ကျောင်းတိုက် အတွင်းက နာရီစင်

မြန်မာ့သမိုင်း၊ မြန်မာ့ဗုဒ္ဓဘာသာသမိုင်း၊ မန္တလေးမြို့ဗုဒ္ဓဘာသာသမိုင်းမှာ အထင်ကရဖြစ်တဲ့ မန္တလေး-မစိုးရိမ်ကျောင်းတိုက်ကြီးရဲ့ နှစ်တစ်ရာပြည့်ပွဲတော်ကို ၂၀၀၇၊ ဒီဇင်ဘာ (၂၊ ၃၊ ၄)ရက်များမှာ ခြိမ့်ခြိမ့်သဲ ကျင်းပသွားပါတယ်။

အထိမ်းအမှတ်ပြခန်း

ပြီးခဲ့တဲ့ စက်တင်ဘာ ရွှေဝါရောင်တော်လှန်ရေး(သံဃာတော်များရဲ့ ရဲဝံ့သော ပြယုဂ်)အတွင်း မန္တလေး-မစိုးရိမ်ကျောင်းတိုက်မှ သံဃာများရဲ့ သမိုင်းဝင် ဆောင်ရွက်ချက်များမှာ ယခုအခါ ပူပူနွေးနွေးပဲ ရှိသေးတာပါ။

ယခုလည်း နအဖ စစ်ထောက်လှမ်းရေးများ ခြေချင်းလိမ်နေတဲ့ ကြားမှာပဲ မစိုးရိမ်၊ ရာပြည့်ပွဲကို ကျင်းပသွားပါတယ်။

အထိမ်းအမှတ် မှတ်တမ်း

နှစ်တစ်ရာပြည့်အထိမ်းအမှတ်အဖြစ် နေ့စဉ်သံဃာတော် အပါး ၁၀၀၀ တို့ကို ဆွမ်းလောင်းလှူခြင်း၊ ဆွမ်းဆက်ကပ်ခြင်းနှင့် ကြည်ညိုသဒ္ဓါပွားစေရန် သံဃာတော်များရဲ့ သင်္ဂါယနာတင်သရုပ်ဖော်အခမ်းအနားများ ကျင်းပခြင်း စသဖြင့် ပြုလုပ်သွားပါတယ်။

ဒီဇင်ဘာ ၂ ရက် ညပိုင်းမှာ သီတဂူဆရာတော်တရားပွဲနှင့် မြို့မအပျော်တမ်းတေးဂီတအဖွဲ့၊
ဒီဇင်ဘာ ၃ ရက် ညပိုင်းမှာ ခင်မကန်တိုက် မိုးတားကျောင်း ဆရာတော်တရားပွဲနှင့် မြတရာအငြိမ့်၊
ဒီဇင်ဘာ ၄ ရက် ညပိုင်းမှာ တိပိဋကဓရ ယောဆရာတော်တရားပွဲနှင့် ရွှေမြန်မာတေးဂီတအငြိမ့်ခန်း....
စသဖြင့် စည်ကားစွာ ကျင်းပသွားပါတယ်။

အငြိမ့်

ပွဲတော်ရက်များအတွင်း သတင်းပြန်ကြားရေးနှင့် ဖျော်ဖြေရေးဆပ်ကော်မတီမဏ္ဋပ်မှာ နှစ်တစ်ရာပြည့် အထိမ်းအမှတ်စာအုပ်တစ်အုပ် ၃၀၀၀ ကျပ်၊ မစိုးရိမ်သမိုင်းနှင့် သာသနာဝင်စာအုပ် တစ်အုပ် ၃၀၀၀ ကျပ်၊ ပြက္ခဒိန်တစ်ခု ၅၀၀ ကျပ်၊ မစိုးရိမ်နှစ်တစ်ရာပြည့်တေးအလင်္ကာ VCD ခွေတစ်ချပ် ၁၂၀၀ ကျပ် နှုန်း များဖြင့် ရောင်းချပေးသွားကြောင်း သတင်းရရှိပါတယ်။

သတင်း/ပြန်ကြားရေးနှင့် ဖျော်ဖြေရေး ဆပ်ကော်မတီ

မစိုးရိမ်ရဲ့ နှစ်တစ်ရာပြည့်ပွဲတော်ကြီးမှာ တကယ့်ကို သတိရစရာဖြစ်ရတာကတော့ မစိုးရိမ်ဆရာတော်ဘုရားကြီး အရှင်ကောဝိဒါဘိဝံသ (ယခုအခါ သာသနာ့မောဠိ - အပြည်ပြည်ဆိုင်ရာ မြန်မာရဟန်းတော်များ အဖွဲ့ချုပ် - ပဓာနစေရ ဆရာတော် ဦးကောဝိဒါဘိဝံသ) ဖြစ်ပြီး ယခုအခါ ဆရာတော်ဘုရားကြီးမှာ မြန်မာပြည် စစ်အဆိုးရ၏ ရက်စက်ကြမ်းကြုတ်သော လုပ်ရပ်များကြောင့် ဗုဒ္ဓသာသနာတော် ညှိုးမှိန် ရခြင်းများကို ပြည်ပမှ စွမ်းစွမ်းတမံ ကာကွယ်ဆောင်ရွက်လျက်ရှိပါတယ်။

ပြခန်းမှာ တွေ့ရတဲ့ ဆရာတော်ကြီး ဦးကောရဲ့ ပုံတော်

(ဆရာတော်ဘုရားကြီး ဦးကောဝိဒါဘိဝံသ အကြောင်း ကို http://aoab.blogspot.com/2007/11/blog-post_3793.html တွင် ဖတ်ရှုနိုင်ပါသည်။)

(သာသနာ့မောဠိ - အပြည်ပြည်ဆိုင်ရာ မြန်မာရဟန်းတော်များ အဖွဲ့ချုပ် အကြောင်းကို http://sasanamoli.blogspot.com/ တွင် အသေးစိတ် ဖတ်ရှုနိုင်ပါသည်။)

ပြခန်းမှာ တွေ့ရတဲ့ ဆရာတော်ကြီး ဦးကောရဲ့ ဆုံးမစာ

( မူပိုင် - ညိုကြီး )

ကဗျာဆရာတစ်ယောက်ကတော့ တကယ်ပါသွားရှာပြီ

လူထုဒေါ်အမာ မွေးနေ့မှာ ကဗျာရွတ်ပွဲ ဆင်နွှဲခဲ့ကြသော ကဗျာဆရာအုပ်စုတစ်စု

အသက်(၉၂)နှစ်ပြည့် လူထုဒေါ်အမာ မွေးနေ့ပွဲမှာ အောင်ဝေး ရဲ့ ကဗျာစာရွက်မိတ္တူများကို တက်တက်ကြွကြွ၊ ရဲရဲရင့်ရင့် ဝေငှခဲ့သော နာမည်ကြီး ကဗျာဆရာမှာ ယခုအခါ ဖမ်းဆီးခံလိုက်ရပြီဟု နအဖ ထောက်လှမ်းရေးတစ်ဦးထံမှ သတင်း အတိအကျ ရရှိပါသည်။
(ထိုကဗျာဆရာ၏ အမည်မှာ စနေနံနှင့် စပြီး ဗုဒ္ဓဟူးနံနှင့် ဆုံးသော နာမည်သုံးလုံးပါ ကဗျာဆရာဖြစ်သည်။ ကလောင်အမည်ရင်းကို မဖော်ပြရခြင်းမှာ သူ၏ ကလောင်ရှေ့ရေးကို ငဲ့ကွက်သောအားဖြင့် ဖြစ်ပါသည်။)

စစ်အဆိုးရ၏ မျက်မုန်းကျိုး လိုက်လံရှာဖွေခြင်းခံနေသော အခြားကဗျာဆရာများမှာမူ ယခုအခါ လွတ်မည်ဟုထင်ရသော နေရာများတွင် ပုန်းခိုနေရကြောင်း သတင်းရရှိပါသည်။

ထိုကဲ့သို့ ထွက်ပြေးနေရသော ကဗျာဆရာများထဲမှ တစ်ဦးက ``ကျုပ်တို့က ကဗျာစာရွက်လေးတွေပဲ ဝေတဲ့ဟာဗျာ။ ဘာမှ အကြမ်းဖက်တာလည်း မပါဘူး။ ရက်စက်တာလည်း မပါဘူး။ သူတို့ပြောပြောနေတဲ့ ဆူပူဆန္ဒပြတဲ့ဟာမျိုးလည်း မဟုတ်ဘူး။ အခုဟာက ကျုပ်တို့ကို ရာဇ၀တ်သားတွေ လိုက်ဖမ်းသလိုကို သည်းကြီးမည်းကြီး လိုက်ဖမ်းနေကြတာဗျ။ ရယ်စရာအတော်ကောင်းတဲ့ စစ်အဆိုးရပါပဲဗျာ။ ဒါပေမဲ့ ကျုပ်တို့ကတော့ အခုပုန်းနေရင်းက အဖမ်းခံလိုက်ရရင်လည်း ကြောက်သွားမှာ မဟုတ်ဘူး။ အဖမ်းခံရတာက လွတ်လာရင် ကိုယ့်တိုင်းပြည်အတွက် လုပ်စရာရှိတာတွေ ဆက်လုပ်သွားရမှာပါပဲဗျာ။ အခုအဖမ်းခံလိုက်ရတဲ့ ကျုပ်တို့သူငယ်ချင်းကြီးလည်း အဲသလို စိတ်ဓာတ်မျိုးရှိပါလိမ့်မယ်။´´ ဟု ပြောကြားသွားကြောင်းလည်း သတင်းရရှိပါသည်။

03 December 2007

Pamphlet Campaign ကို ထောက်ခံကြိုဆိုပါသည် အရှင်ဘုရား



သီရိလင်္ကာရောက်မြန်မာရဟန်းတော်များအဖွဲ့မှ နိုင်ငံကတာလေဆိပ်များ၌ ဝေငှမည့် (Pamphlet Campaign) လက်ကမ်းစာစောင်ပုံစံဖြစ်ပါသည်။ Pamphlet Campaign အစီအစဉ်ကို (03/ 12/ 2007) နေ့မှ စတင်၍ သီရိလင်္ကာနိုင်ငံ ကိုလံဘိုလေဆိပ်၊ မလေးရှားနိုင်ငံ ကွာလာလမ်ပူလေဆိပ်များ အတွင်း ခရီးသွားသံဃာတော်များက စတင်ဆောင်ရွက် သွားတော့မည်ဖြစ်သည်။

02 December 2007

လူတွေကို စစ်ခွေးတွေ လိုက်ကိုက်နေကြပြီ

(၂၉.၁၁.၀၀၇)ရက်နေ့က လူထုဒေါ်အမာမွေးနေ့ပွဲတွင် တော်လှန်ရေးကဗျာဆရာ အောင်ဝေး၏ ``အမေ နဲ့ သား (သို့မဟုတ်) ´သ´ ၀ဂ်ကထာ´´ ကဗျာကို ပရိတ်သတ်နှင့် အမေလူထုဒေါ်အမာတို့ထံ ဖြန့်ဝေခဲ့ကြသော တော်လှန်ရေး ကဗျာဆရာများ ကို ယခုအခါ နအဖ စစ်ထောက်လှမ်းရေးများ က အမဲလိုက်သလို လိုက်လံ ဖမ်းဆီးလျက် ရှိချေပြီ။
(လူကို ခွေးက လိုက်ကိုက်ဖို့ ကြိုးစားသလိုပေါ့ဗျာ။)

ထိုနေ့က ကဗျာစာရွက်ကို အားကြိုးမာန်တက် ဖြန့်ဝေပေးခဲ့သော နာမည်ကြီးကဗျာဆရာတစ်ဦးမှာလည်း ဖမ်းဆီးခံရပြီဟု သတင်းထွက်နေသည်။

ထိုကဗျာ ဖြန့်ဝေမှုနှင့် တွင် ပါဝင်ပတ်သက်ခဲ့သော အခြားကဗျာဆရာတစ်ချို့မှာလည်း လွတ်မည်ဟု ထင်ရသော နေရာများသို့ တိမ်းရှောင်ပုန်းအောင်းနေရကြောင်း စိတ်မကောင်းဖွယ်ရာ ကြားသိရပါသည်။

(စစ်ခွေးများ၏ လိုက်အကိုက်ခံနေရသော အထက်ပါ ကဗျာဆရာများ၏ နာမည်များကို အခြေအနေအရ ချန်လှပ်ထားခဲ့ရပါသည်ခင်ဗျား။)
(ထိုသတင်းကို အတည်ပြုနိုင်ရန် ဆက်လက်ကြိုးပမ်းနေပါသည်။ သေချာလျှင် ထပ်ပြောပြပါမည်ခင်ဗျား)

ကယ်တော်မူကြပါဦးဗျို့..................
ကယ်တော်မူကြပါဦးဗျို့..................
ကယ်တော်မူကြပါဦးဗျို့..................