19 July 2020

တပ်ထွက်များ၊ အကျင့်ပျက်ဝန်ထမ်းများနဲ့ မြန်မာနိုင်ငံ့အရေး

“တပ်ထွက်များ၊ အကျင့်ပျက်ဝန်ထမ်းများနဲ့ မြန်မာနိုင်ငံ့အရေး”

ဒွန်ညိုကြီး

“တပ်ထွက်” လို့ ဆိုတာက တပ်မတော် သို့မဟုတ် စစ်တပ်ကနေ အငြိမ်စားယူပြီး အရပ်ဖက် ဝန်ထမ်းလောက၊ စီးပွားရေး၊ နိုင်ငံရေး စသဖြင့်မှာ ဝင်ရောက်ပြောင်းရွှေ့လှုပ်ရှားနေကြတဲ့ သူများကို ဆိုလိုတာပါ။ “မိုးကျရွှေကိုယ်” ဆိုပြီး ခေါ်ဆိုကြတာလည်း ရှိပါတယ်။ မိုးပေါ်က ကျလာသလို စစ်တပ်က အငြိမ်းစားယူပြီးတာနဲ့ အရပ်ဖက်ဝန်ထမ်းလောကမှာ ရာထူးအမြင့်နေရာကနေ ဘေးတိုက်ဝင်ပြီး တာဝန်ထမ်းဆောင်တော့ ဆိုင်ရာဝန်ကြီးဌာနမှာ အခြေကနေ တက်လာတဲ့ ဝန်ထမ်းတွေအတွက် တိုးစရာ ရာထူးနေရာလွတ် ပိတ်ဆို့တဲ့သဘောမို့ မိုးကျရွှေကိုယ်တွေဆိုပြီးလည်း ခေါ်ဆိုကြတာပါ။ အချို့ဆိုရင် မူလစစ်ဘက်တာဝန်ထက် တစ်ဆင့်/နှစ်ဆင့် မြင့်တဲ့ ဝန်ထမ်းရာထူးတွေကို ခုန်ကူးယူတာမျိုးပါ။

ဇာတ်လမ်းက ဘယ်ကစသလဲဆိုတော့ ရှေးသမိုင်းတွေကို မပြောလိုတော့ဘဲ ၁၉၈၈ ခုနှစ်၊ နိုင်ငံလုံးဆိုင်ရာ အထွေထွေသပိတ်ကာလအပြီးမှာ အာဏာသိမ်းပြီးတက်လာတဲ့ တပ်မတော်အစိုးရ သို့မဟုတ် စစ်အစိုးရ အုပ်ချုပ်စဉ်ကာလတွေကနေပဲ စပြောပါ့မယ်။ နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့ ကာလမှာလည်း နိုင်ငံတော်ခမျာ ငြိမ်ဝပ်ပိပြားပြီး တပ်ဘက်က အရပ်ဘက်ပြောင်းလာတဲ့ တပ်ထွက်တွေ သူဌေးဖြစ်အောင် တည်ဆောက်ခဲ့ကြပါတယ်။ နိုင်ငံတော်အေးချမ်းသာယာရေးနဲ့ ဖွံ့ဖြိုးရေးကောင်စီကာလ မှာလည်း နိုင်ငံတော်တော့ မသိ၊ တပ်ထွက်တွေကတော့ အေးချမ်းသာယာပြီး ဆက်လက်ဖွံဖြိုးတိုးတက်ခဲ့ ကြပါတယ်။ ဦးသိန်းစိန်အစိုးရလက်ထက်မှာလည်း တပ်ထွက်တွေ အရပ်ဘက်ကို ဝင်လာမစဲ တသဲသဲရှိလို့မို့ ကျန်းမာရေးဝန်ကြီးဌာနအတွင်းက ဆရာဝန်တွေရဲ့ ဖဲကြိုးနက်လှုပ်ရှားမှုတွေနဲ့ တပ်ထွက်တွေ အရပ်ဘက်ကို ထပ်မဝင်လာဖို့ စုစည်းဆော်ဩခဲ့ကြတာကို အမှတ်ရကြမယ်ထင်ပါတယ်။

တပ်မတော်သား၊ စစ်သားလည်း ကိုယ့်နိုင်ငံသားပါပဲ။ ဒါကိုလက်ခံပါတယ်။ သူတို့မှာလည်း သူတို့ကို မှီခိုနေတဲ့ မိသားစုတွေ၊ သူတို့ရဲ့ ရှေ့ဘဝတက်လမ်းတွေ၊ တိုင်းပြည်တာဝန်ထမ်းဆောင်လိုစိတ်ရှိတာတွေကို  နားလည်လက်ခံနိုင်ပါတယ်။ ရောဂါကြောင့်ဖြစ်စေ၊ ဒဏ်ရာကြောင့်ဖြစ်စေ၊ တာဝန်ပေးလို့ဖြစ်စေ၊ တပ်ဘက်မှာ တာ၀န်မထမ်းဆောင်လိုတော့ဘဲ အရပ်ဘက်ကို ပြောင်းလဲတာ၀န်ထမ်းဆောင်လိုလို့ဖြစ်စေ စစ်တပ်က အငြိမ်းစားယူပြီးတာနဲ့ ဆက်လက်တာဝန်ထမ်းဆောင်နိုင်သေးတယ်ဆိုရင် အရပ်ဘက်ဝန်ထမ်းတွေအဖြစ် ကူးပြောင်းတာဝန်ထမ်းဆောင်လေ့ရှိတာကို အတိုင်းအတာတစ်ခုအထိ လက်ခံ၊ ခံစားလို့ရပါတယ်။

ပြဿနာစခဲ့တာက စစ်အစိုးရလက်ထက်ကာလမှာ တစ်နိုင်ငံလုံးကို စစ်ယူနီဖောင်းဝတ်ပြီး ဗိုလ်တွေဖြစ်စေချင်တဲ့ စေတနာနဲ့ စစ်သားထက် ဗိုလ်သင်တန်းသားများစွာခေါ်ယူပြီး အဘစိတ်ဓာတ်များကို လူငယ်များရဲ့ ဦးနှောက်များအတွင်း ရိုက်သွင်းပေးခဲ့ခြင်းပါပဲ။ စစ်ဆေး၊ စစ်အင်ဂျင်နီယာ၊ စစ်သူနာပြု နယ်ပယ်အစုံပါပဲ။ မေမြို့က တပ်ဂျီတီအိုင်ကျောင်းကတော့ ကျောင်းသားတွေ ပုန်ကန်တာနဲ့ ကျောင်းကို ဖျက်ပစ်လိုက်ရတာမျိုးတော့ ရှိခဲ့ပါတယ်။ ဒီတော့ တစ်နေ့တခြား ဗိုလ်တွေများလာပြီး တပ်ကနေ အရပ်ဘက်ပြောင်းတဲ့ ဗိုလ်ပမာဏကလည်း များပြားခဲ့ပါတယ်။ ဗိုလ်ကြီး၊ ဗိုလ်မှူးကအစ စုံလင်စွာပေါ့လေ။

ပြောချင်တာက ဒီလိုပါ။ စစ်သားလည်း နိုင်ငံကို ချစ်မှာပါ။ ခက်တာက သာမန် ပြည်သူပြည်သားတွေနဲ့ တိုင်းပြည်ကို ချစ်ပုံချစ်နည်းတွေ ကွဲပြားနိုင်တာပါ။ ဘက်ဆိုတာရှိပါတယ်။ ဆရာဆိုတာရှိပါတယ်။ အုပ်စုဆိုတာရှိပါတယ်။ ကိုကြီးညီလေးဆိုတာ ရှိပါတယ်။ “တို့စစ်ခေါင်းဆောင်တွေ ပြည်သူပဲ သတ်သတ်၊ ခြပဲစားစား၊ လာဘ်ပဲယူယူ တို့ကြည်ဖြူသည်” ဆိုပြီး ကြောက်လို့ဖြစ်စေ၊ တစ်သွေးတစ်သံတစ်မိန့်အရဖြစ်စေ၊ ယုံကြည်လို့ဖြစ်စေ၊ မိမိလည်း အကျိုးရှိလို့ဖြစ်စေ ဒါတွေက ဖြစ်ပျက်ခဲ့ကြပြီးပါပြီ။

ဇာတ်လမ်းက အခုမှ စမှာပါ။ ဝန်ထမ်းလောကထဲက တပ်ထွက်တွေကို တစ်ချက် ကြည့်ကြရအောင်ပါ။ သဘောက ဗျာ။ တပ်ထွက်တွေအချင်းချင်း လူစုပြီး စားကြသောက်ကြပြီဆိုပါစို့။ “အမေ ဒေါ်အောင်ဆန်းစုကြည်ကတော့ တို့နိုင်ငံအတွက် ဆုလာဘ်ကြီးပဲဟေ့” တို့ဘာတို့၊ “တို့အဘတွေ လုပ်ခဲ့တာတွေကလည်း တရားလွန်ပါတယ်ကွာ” တို့ဘာတို့ ပြောကြမယ်ထင်ပါသလား။ မိတ်ဆွေတို့ ဘယ်လိုထင်ပါသလဲ။ အဲဒါကို ကြောက်တာပါ။ အရပ်ဘက်ကို ပြောင်းပြီးသား တပ်ထွက်ဝန်ထမ်းတွေက အုပ်စုဖွဲ့၊ ဘက်ညီပြီး ဘယ်သူ့ကို သစ္စာခံမလဲဆိုတာ အရေးကြီးပါတယ်။

“တက်တဲ့အစိုးရ ငါ့အစိုးရ” ပဲဆိုပြီး လက်ရှိ ဒေါ်အောင်ဆန်းစုကြည်အစိုးရကိုပဲ လုံးလုံး သစ္စာခံ စောင့်သိမယ် ထင်ပါသလား။ ဒါကို ကြောက်တာပါ။ ဝန်ထမ်းစည်းမျဉ်းစည်းကမ်းတွေ၊ ဉပဒေတွေက မရှိ မဟုတ်ဘူး ရှိပါတယ်။ ဒါပေမဲ့ သတင်းပေးလို့ရတယ်၊ ချောက်တွန်းလို့ရတယ်၊ ပုံဖျက်လို့ရတယ်၊ ထိမ်ချန်လို့ရတယ်၊ သပ်လျှိုလို့ရတယ်၊ အဆင်းကို ဘီးတပ်လို့ရတယ်၊ လမ်းကြောင်းကို ချိန်ညှိလို့ရတယ်။ အများကြီးပါ။ တပ်ထွက်အားလုံးကို မယုံကြည်တာ မဟုတ်ပါ။ ပင်ကိုယ်စိတ်ရင်းကောင်းမွန်ပြီး အဘမျက်နှာ မကြည့်ဘဲ တိုင်းပြည်မျက်နှာပဲ ကြည့်တတ်တဲ့ တပ်ထွက်ဝန်ထမ်းတွေလည်း ရှိမှာပါ။

ခက်တာက ဝန်ထမ်းလောကမှာရှိတဲ့ အရပ်ဘက်ပြောင်း တပ်ထွက်အင်အားစုက နည်းနည်းလေး မဟုတ်ပါ။ ဌာနတစ်ခုခုမှာ ဆုံးဖြတ်ချက်ချမှတ်နိုင်လောက်တဲ့ အရာရှိအဆင့်တွေက အများစုဖြစ်ပြီး သမ္မတရုံးကအစ (သမ္မတရုံးကအစ) (သမ္မတရုံးကအစ) ဝန်ကြီးဌာနပေါင်းစုံမှာ ညွှန်မှူး၊ ညွှန်ချုပ်အထိ တပ်ထွက်တွေ အများကြီး ရှိပါတယ်။ ဒါတောင် တပ်ထွက်မဟုတ်ဘဲ တပ်မိသားစုဝင် ဝန်ထမ်းတွေ၊ တပ်မှာ ခဏတာ တာဝန်ထမ်းဆောင်ခဲ့ဖူးတဲ့ ဝန်ထမ်းတွေ၊ အဘသစ္စာခံ အရပ်သားဝန်ထမ်းတွေ၊ အကျင့်ပျက်ဝန်ထမ်းတွေ အများကြီး ရှိပါသေးတယ်။ ဒါကို ပြောချင်တာပါ။

ဒီစာအစမှာ ပြောခဲ့သလိုပဲ တပ်ထွက်တွေက ဝန်ထမ်းလောကမှာတင်မကပါဘူး အခြားနိုင်ငံရေး၊ စီးပွားရေးလောကမှာလည်း အခိုင်အမာ ခြေကုပ်ယူပြီး အချင်းချင်းချိတ်ဆက်ထားကြတာ အများကြီးပါ။

နိဂုံးချုပ်ပြောရရင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် လက်ရှိ အာဏာရအစိုးရအနေနဲ့ ကုန်လွန်ခဲ့တဲ့ အစိုးရသက်တမ်းလေးနှစ်ကျော်ကို ပြန်တွက်ကြည့်စေချင်ပါတယ်။ ဝန်ကြီးဌာနတွေ အခြေအနေဘယ်လိုရှိသလဲ၊ အဘအုပ်စု ဝန်ထမ်းတွေ ဘယ်လိုရှိသလဲ၊ ဒေါ်အောင်ဆန်းစုကြည်ကို အမေအစ်မ ဖားပြီး ကိုယ်ကျိုးရှာတတ်တဲ့ ဝန်ထမ်းတွေကိုကော မြင်ခဲ့မိရဲ့လား ချိန်ဆစေချင်ပါတယ်။ “ရှေ့မှာ ဖားဖား၊ နောက်မှာ ဟားဟား” ဆိုပြီး အိပ်ကပ်ထဲ ပါးပါးနပ်နပ်နဲ့ သိမ်းကျုံးထည့်နေတတ်တဲ့ ခေါက်ရိုးကျိုး အကျင့်ပျက်ဝန်ထမ်းတွေ ရှိနေသေးတာကိုကော ဘယ်လိုလုပ်မလဲ။ အကျင့်ပျက်ဝန်ထမ်းကတော့ တပ်ထွက်ထွက်၊ တပ်မထွက်ထွက် အရပ်သားဝန်ထမ်းတွေထဲမှာလည်း အများကြီးရှိနေနိုင်ပါတယ်။

စိုးရိမ်တာကတော့ အာဇာနည် ဦးအောင်ဆန်းနဲ့ အစိုးရအဖွဲ့ဝင်တွေ ၁၉၄၇ ခုနှစ်မှာ လုပ်ကြံခံခဲ့ရစဉ်ကလို လုံခြုံရေးကို ဂရုမစိုက်မိ၊ လျှော့တွက်မိခဲ့တာမျိုး မဖြစ်စေချင်တာပါ။ “သေသေကွာ..” “ငါကောင်းတာ လုပ်နေတာပဲ ... မကောင်းတဲ့သူတွေလည်း ငါ့လို ကောင်းတာတွေ လိုက်လုပ်လာမှာပဲ” “တိုင်းပြည်ကောင်းစားအောင် ငါလုပ်နေတာပဲ.. ငါ့ကို အကောက်ကြံတဲ့သူ မရှိလောက်ပါဘူး” ဆိုပြီး လျှော့မတွက် စေချင်ပါ။ “မေတ္တာပေးရင် မေတ္တာရမယ်” ဆိုပေမယ်လို့ ကိုယ်ပေးတဲ့ မေတ္တာကို မခံယူနိုင်လောက်အောင် အဘစိတ်ဓာတ် ကြီးစိုးခိုင်မာနေတဲ့သူတွေ အများကြီး ရှိနေနိုင်ပါသေးတယ်။ ဒီအစိုးရသက်တမ်း ကာလကြီးထဲမှာ ရန်ကုန်လေဆိပ်လို အထင်ကရနေရာမှာ ရှေ့နေဦးကိုနီ နေ့ခင်းကြောင်တောင် လုပ်ကြံခံခဲ့ရတာက သက်သေသာဓက တစ်ခုပါပဲ။

ဒေါ်အောင်ဆန်းစုကြည် လုပ်ကြံခံရနိုင်တယ်ဆိုတာမျိုးအထိ ပြောလိုရင်းမဟုတ်ပါ။ “ကိုယ့်လူ သူ့ဘက်သား” လုပ်နေကြမှာကို စိုးရိမ်တာပါ။ “သူ့လူ ကိုယ့်ဘက်သား” ကနည်းပြီး “ကိုယ့်လူ သူ့ဘက်သား” က များနေမလား ဆိုတာမျိုး တွေးစေချင်တာပါ။ တစ်ချက်သတိမူရမှာက လက်ရှိအစိုးရက ခန့်ထားတဲ့ ဝန်ကြီး၊ ဒုဝန်ကြီး စတာတွေနဲ့ ဝန်ထမ်းအသစ်တွေကလွဲလို့ ကျန်တဲ့ ဝန်ထမ်းတွေဟာ အရင်အစိုးရ၊ အချို့ဆိုရင် အရင်အစိုးရအဆက်ဆက်ကတည်းက တာဝန်ထမ်းဆောင်ခဲ့ကြတာပါ။ မျက်နှာနှစ်ဖက်နဲ့ ဝန်ထမ်းတွေ အများကြီး ရှိနေပါသေးတယ်။ ဘာမဆို ဖြစ်သွားနိုင်ပါတယ်။

ဒွန်ညိုကြီး (၂၁-၆-၂၀၂၀)

Blogger at
bigbbrown.blogspot.com